Sot, 29 tetor 2025, një delegacion nga Fondacioni për Zhvillim dhe Qytetërim AXIS, i udhëhequr nga Kryetari z. Rufat Sherifi, i shoqëruar nga Kryetari i Qendrës për Mirëkuptim dhe Bashkëpunim Institucional (QMBI), Dr. Kujtim Kasami, dhe Mr. Milazim Mustafa, anëtar i Kryesisë së QMBI, zhvilluan një vizitë zyrtare në Universitetin “Nënë Tereza” (UNT) në Shkup, ku u prit ngrohtësisht nga Rektori Prof. Dr. Bekim Fetaji.
Gjatë takimit, z. Sherifi e uroi Rektorin Fetaji për marrjen e detyrës së re si Rektor i Universitetit “Nënë Tereza”, duke i dëshiruar suksese në drejtimin e institucionit dhe në realizimin e objektivave zhvillimore të universitetit.
Takimi u zhvillua në një frymë miqësore dhe bashkëpunuese, ku u ndanë ide dhe vizione për forcimin e bashkëpunimit ndërmjet Fondacionit AXIS dhe Universitetit “Nënë Tereza”.
Diskutimet u përqendruan në fusha me interes të përbashkët, si:
– arsimi dhe edukimi i të rinjve,
– kërkimi shkencor dhe zhvillimi profesional,
– promovimi i kulturës, dialogut ndërkulturor dhe vlerave të bashkëjetesës.
Gjatë bisedës, Rektori Prof. Dr. Bekim Fetaji ndau planet strategjike të universitetit për zhvillimin akademik dhe institucional, ndërsa z. Rufat Sherifi shprehu mbështetjen e plotë të Fondacionit AXIS për nisma që synojnë përmirësimin e cilësisë akademike dhe forcimin e sistemit arsimor në vend.
Në përfundim të takimit, të dy palët u zotuan të vazhdojnë komunikimin dhe koordinimin e ndërsjellë, për të konkretizuar projekte të përbashkëta që do të kontribuojnë në zhvillimin arsimor, kulturor dhe shoqëror të Maqedonisë së Veriut.
Fondacioni për Zhvillim dhe Qytetërim AXIS
Shkup, 29 tetor 2025
